أصحاب أنا وأنت ولا كنت دايما وحيدة....عمري ما لقيت واحدة أقول دي فعلا الصديقة من وحدتي بقت الوحدة صحبتي ومعاها القلم والورقة والدموع البرد بقي شيء عا

كنت دايما وحيدة....عمري ما لقيت واحدة أقول دي فعلا الصديقة

من وحدتي بقت الوحدة صحبتي ومعاها القلم والورقة والدموع

البرد بقي شيء عادي رغم انه بيوجع

الوحدة برضه شيء صعب...لكن اكتشفت في وقت اني بقيت متعودة عليها..بل ألجأ لها كمان

دخلت الكلية وكانت طبعا دنيا جديدة عليا..دنيا أوسع من المدرسة

دخلتها وأنا خايفة وحيرانة

بدأت واحدة واحدة أتعرف ع الناس لكن برضه سرعة التعارف ماكانتش موجودة أوى

يمكن بعد سنة ونص أتوسع التعارف وفين عقبال ما بقي في جروب

كانت مجموعة متميزة في شغلها وبرضه كان فيها من كل أنواع الناس

اصلي في الكلية عرفت بجد إن كتر الناس يساعد علي التعرف علي أنواع اكتر من الناس

وعلي فكرة كانت كلية بنات وبس

اتعمقنا في الشغل وكمان العلاقة اتعمقت جدا..

مرت فيها كل الأوقات ياما فرحنا وعشنا وهيصنا ولعبنا وكل حاجة حلوة

..وياما حصلت حاجات وخيانة وضرب في الضهر

كنا نرجع نتكلم ...لكن القلوب برضه كانت بتبقي شايلة من بعض

جه عليا وقت في آخر فترة بالكلية وحسيت أن في ناس هي دي اللي خرجت بيها..ناس تانية مش عايزة اعرفها تاني...ناس وناس وناس

وكأني كنت بمر بالمصفاة أو بقسم الناس لأقسام عندي

طبعا سبق ذلك فترة صعبة من تقلب في المشاعر وأزمات مريت بيها

والنهاردة أنا خلاص اتخرجت اهو...بس معرفش ليه فعلا مابقيتش اكلم حد

أو بمعني اصح مش كل الناس ..وكأني بطبق التقسيم

اللي مش عايزة اعرفهم بطلت أكلمهم

في ناس السؤال بيكون واجب وخلاص وناس بكلمهم بحب وناس بزعل لو نسيوني..كده يعني

مش عارفة أنا ليه كده اتغيرت كتير..أو ماله حالي بقي كده..وكان وجود الناس دي في حياتي مش فارق

لكن برضه لازم في جانب مشرق اني في حياتي وخارج مجتمع الكلية في ناس حبيتهم وأصدقاء سعيدة بيهم جدا

علي رأسهم (احمد) واللي معاه عرفت معني جديد وجميل وعميق لصداقة واضحة وصريحة ومحترمة جدا

وكمان بنوتي الصغيرة وصديقتي (دينا) واللي برتاح معاها في الكلام اوي وبينا برضه صراحة جميلة

وناس تانيين حبيتهم حتى لو ما كناش أصدقاء زي سارة الشعنونة

ومن أهل الكلية مش هانسي (سمسمة) ولا (يويا) ولا حبي (مرمورة)

أنا مستغربة أنا كتبت الموضوع دا ليه...ولا ليه فتحت موضوع الصداقة أصلا..بس يمكن حبيت أفضفض وكمان أغير مود الموضوعات

وحاسة اني هالاقي ناس كتير عندها ياما تحكي عنه في موضوع الصداقة

وحد يقولي ليه ممكن بيحصل لنا كل دا؟؟ ليه الصداقة ساعات نلاقي فيها اللي خان واللي باع

رغم إننا برضه بنلاقي فيها الحضن الحنين

العيب في مين؟؟

كمان عندي سؤال ممكن ياخدنا لسكة كمان...هو مش المفروض إن يكون في تسامح بين الأصدقاء؟؟